Дархан-Уул аймгийн Засаг даргын Тамгын газар

Онцлох мэдээ

22-03-30 06:32

ДАРХАН-УУЛ АЙМАГТ “ЭРҮҮЛ МЭНДИЙН ДЭМЖИХ ТӨВ” НЭЭГДЛЭЭ

Эрүүл мэндийн дэмжих төвд улсын төсвийн 1850.0 сая төгрөгийн хөрөнгө оруулалтаар иж бүрэн засвар үйлчилгээг хийж доорх тоног төхөөрөмжүүдийг ашиглалтад оруулж байна.

– Чих хамар хоолойн үзлэг, эмчилгээ- Чих хамар хоолойн үзлэгийн дуран

– Тимпанаметр, Аудиометр

– Спирометр,Биеийн бүтэц тодорхойлох аппарат

– Автомат жин (өндөр хэмжигчтэй)

– Ясны сийрэгжилт үзэх аппарат,

– Тархины доплер

– Ачаалалтай зүрхний цахилгаан бичлэгийн аппарат

– Зүрхний цахилгаан бичлэгийн аппарат -Нүдний хараа шалгах таблиц

– Слит ламп, Авторефракто /кератометр аппарат/

– Суурин ЭХО аппарат

– Зөөврийн ЭХО аппарат

– Уян дуран,

– Шүдний кресло, Автоклав, Ломбоны гэрэл, Шүдний рентген аппарат /зөөврийн/,Шүдний чулуу өнгөр цэвэрлэх чичиргээт машин, Шүлс соруулах, зөөврийн аппарат, соруулагчийн гар зэрэг багтаж байна.Мөн 796.1 сая төгрөгийн 34 нэр төрлийн 95 ширхэг тавилга, тоног төхөөрөмж хүлээн авч суурилуулжээ.

Тус төвд Рентген зураг, Биеийн бүтэц тодорхойлох, Шүд, Яс сийрэгжилт Хоолзүй, Дуран, Зүрхний бичлэг,Тархины бичлэг, ЭХО,Чих, хамар хоолой, Арьс харшил, Эмчийн үзлэг тус тус хийгдэнэ. Хүн амыг зонхилон тохиолдох халдварт болон халдварт бус өвчнөөс урьдчилан сэргийлэх, эрт илрүүлэх үзлэг, шинжилгээ, оношлогоонд хамруулах ажлыг энэ төвөөр дамжуулан зохион байгуулна.

Төвийн нээлтэд Эрүүл мэндийн сайд С.Энхболд, УИХ-ын гишүүн Г.Дамдинням, Дархан-Уул аймгийн Засаг Б.Азжаргал, ЭМГ-ын дарга Б.Батцэнгэл, НЭ-ийн дарга Б.Мөнхбат нарын албаны хүмүүс оролцлоо.

22-03-30 06:28

“СУУРЬ СУДАЛГААНЫ ҮР ДҮНД ҮНДЭСЛЭН СУРАЛЦАГЧИЙН СУРЛАГЫН АМЖИЛТЫГ ДЭМЖИХ” СУРГАЛТ ЭХЭЛЛЭЭ

БШУЯ-аас санаачлан Сурагчдын хоцрогдол арилгах хөтөлбөрийн хүрээнд 4 аймагт “СУУРЬ СУДАЛГААНЫ ҮР ДҮНД ҮНДЭСЛЭН СУРАЛЦАГЧИЙН СУРЛАГЫН АМЖИЛТЫГ ДЭМЖИХ” сургалтыг өнөөдрөөс эхлүүлж байна.

Боловсролын үнэлгээний төвийн Үнэлгээ Хөгжүүлэлтийн хэлтсийн ахлах мэргэжилтэн Б.Батсүхээр ахлуулсан ажлын хэсэг сургалтыг ахлан явуулах бөгөөд төсвийг Монгол Улсын Их Хурлын гишүүн, Засгийн Газрын гишүүн Сангийн сайд Болдын Жавхлан ивээн тэтгэжээ.

Дээрх сургалт нь манай аймгаас хэрэгжүүлж буй “Боловсрол-2032” хөтөлбөртэй уялдаж байгаагаараа ач холбогдолтой.

Манай аймгийн хэмжээнд 2021-2022 оны хичээлийн жилд ерөнхий боловсролын 26 бага, дунд, ахлах сургуульд 23682 суралцагч, 1129 багш, 104 удирдах ажилтан, 463 ажилчин ажиллаж байна. Үүнээс бага боловсролд 11814 сурагч, суурь 8268, ахлах ангид 3600 сурагч суралцаж байна.

2 өдөр үргэлжлэх энэхүү сургалтад ерөнхий боловсролын сургуулийн 200 орчим багш нар хамрагдаж байна.

Сургалтад хамрагдсан багш нар төгсөх ангийн сурагчдын Монгол хэл, Математикийн хичээл, ЭЕШ-ын хоцрогдолтой агуулгыг тодорхойлон гаргаж Сурлагын амжилтын түвшинг ахиулахад дэмжлэг үзүүлэх юм байна.

Өнөөдрийн сургалтыг аймгийн Засаг даргын орлогч А.Түвшинбат нээсэн юм.

22-03-30 06:22

НИЙТИЙН ЭРХ АШИГТАЙ ХОЛБООТОЙ АСУУДЛААР ҮГЭЭ ХЭЛЖ, ҮЗЭЛ БОДЛОО ИЛЭРХИЙЛЭХ ЭРХИЙГ “ИРГЭДИЙН ИНДЭР” ОЛГОДОГ

ИРГЭДИЙН ИНДЭР хоёр дахь удаагийн нээлттэй уулзалт өнөөдөр /2022.03.28/ 11:00-14:00 цагт аймгийн ЗДТГ-ын Хурлын танхимд боллоо. Энэ удаагийн уулзалтад биечлэн 30 орчим иргэн оролцож индэрээс дуу хоолойгоо шийдвэр гаргагчдад хүргэсэн бол Дархан хот, DBS, RGB, Цэц.мн фэйсбүүк пэйж хуудасны шууд лайваар, 7037-1212 утсаар давхардсан тоогоор 670 орчим санал, шүүмжлэл, асуултыг иргэд ирүүлсэн юм.

Иргэдийн индэрт аймгийн Засаг дарга болон холбогдох албаныхан оролцож хотын хөгжил, төрийн байгууллагуудын үйл ажиллагаа, нийт иргэдийн эрх ашигтай холбоотой тулгамдсан асуудлуудаар иргэдийн байр суурь, үзэл бодлыг сонсон сонирхсон асуултад нь хариулж, холбогдох мэдээллийг өгдөг. Иргэдийн зүгээс газар олголт, дээвэр засвар, эрүүл мэндийн тусламж үйлчилгээ, муур, шоргоолж устгал, зам талбайн засвар арчлалт, ажлын байрыг нэмэгдүүлэх зэрэг олон асуудлыг энэ удаа ч хөндлөө.

Иргэдээс ирсэн санал хүсэлтийн дагуу энэ жил аймгийн төсвийн хөрөнгөөр тосгоны автобусны буудлуудын саравч бусад тохижилтыг хийх, Дархан захын нүхэн гарцыг камержуулж гэрэлтүүлэгтэй болгох ажлыг дөрөвдүгээр сард багтаан хийх, хурд сааруулагчийг шаардлагатай газруудад байршуулах, уул уурхайтай холбоотой хэлэлцүүлгийг ирэх сард багтаан зохион байгуулах зэрэг үүргүүдийг холбогдох албаныханд өглөө.

Иргэдээс Дархан суманд 0.07 га газрыг олгох асуудлыг байнга тавьдаг. Аймаг орон нутгаас барьж буй бодлогын хүрээнд гэр хорооллыг тэлэхгүй байх, янданг цөөлөх замаар агаарын бохирдлыг бууруулахаар зорьж байна. Энэ хүрээнд 2013 оноос хойш Дархан сумын гэр хорооллыг тэлэхгүй байх хязгаарлалтын бүсийг тогтоосны үр дүнд галлагаатай яндангийн тоог 7 мянга болгон бууруулаад байна. Цаашид ч Дархан суманд 0.07 га газар олгохгүй байх шийдвэр хэвээр мөрдөгдөхийг албаныхан хэллээ.

Өмнөх уулзалтаар 40 гаруй асуудлыг шийдвэрлэн, ажил хэрэг болгох үүрэг даалгаврыг холбогдох албаныханд өгсөний дагуу ОИЦ-ын Б байрны өмнөх замыг нэг чигийн урсгалтай болгосон, хүүхдийн автобусыг нэмж 3 чиглэлд явуулсан зэрэг бодит ажлууд хийгдсэн нь уулзалтын үр юм гэж иргэд талархалтай хандаж байлаа.

22-03-30 06:18

ЭРҮҮЛ МЭНДИЙН САЛБАРЫН УДИРДАХ АЖИЛТНЫ ЗӨВӨЛГӨӨН БОЛЖ БАЙНА

Дархан-Уул аймгийн хэмжээнд эрүүл мэндийн салбарт 1500 гаруй эмч, эмнэлгийн ажилтан, албан хаагч ажилладагаас 150 орчим нь удирдах ажилтан байдаг. Өнөөдөр /2022.03.11/ эрүүл мэндийн салбарын удирдах ажилтны зөвлөгөөн болж өнгөрсөн онд гаргасан амжилт, бүтээлээ хамтдаа ярилцан энэ онд хийх ажлаа төлөвлөлөө.Удирдах ажилтны зөвлөгөөнд аймгийн Засаг даргын орлогч А.Түвшинбат оролцсон юм.

Манай аймгийн Эрүүл мэндийн салбар нь 2021 оны гүйцэтгэл, Ковидын цар тахлын эсрэг авч хэрэгжүүлсэн ажлаараа шалгарч Эрүүл мэндийн яамнаас “Шилдэг байгууллага” өргөмжлөл хүртлээ.

Мөн өнгөрсөн онд Ковидын цар тахлаас сэргийлэх, тэмцэх, бэлэн байдлыг ханган, хариу арга хэмжээг шуурхай авч, тусламж үйлчилгээний тасралтгүй байдлыг ханган ажилласнаас гадна шинэ технологи, шинэлэг арга барилыг нэвтрүүлсэн, гадаад дотоодын хөрөнгө оруулалт дэмжлэг туслалцааг нэмэгдүүлж чадсан юм.

2021онд гаргасан амжилтуудыг дурьдвал:
-Онош зүйн тасагт Нуклейн ялгагч тоологч бүрэн автомат анализатор
-Нэгдсэн эмнэлэг Дезкамер
-ЭМЯ-ны хөрөнгө оруулалтаарХүчилтөрөгчийн бэсрэг үйлдвэр
-Улсын төсвийн хөрөнгө оруулалтаар ЭМЯ-аас оношилгоо, эмчилгээний чадавхийг сайжруулах зорилгоор 64 зүслэгтэй орчин үеийн стандарт хангасан Компьютер томографын аппарат
-“UpToDate” платформыг нэвтрүүлж эхэлсэн
-Коронавируст халдвар (КОВИД-19)-ын эсрэг вакцинжуулалтад 1-р тунд 65434 буюу 86%, 2-р тунд 64211 буюу 84.6%, 3-р тунд 30675 буюу 58% хамруулсан.
-Гүйцэтгэлд суурилсан санхүүжилтийн тогтолцоог нэвтрүүлсэн.
-Эмчлэн тусгаарлах, тусгаарлан эмчлэх ор дэлгэж нийт 885 орны бэлэн байдлыг ханган ажилласан. Нийт 13555 өвчтөн хэвтэн эмчлүүлсэн.
-Сэргэн засах тасаг шинэ тоног төхөөрөмжөөр хангагдсан
-“ НЭГ СЭТГЭЛ” JCI Дархан салбар төслийн хүрээнд “Хавдрын хөнгөвчлөх эмчилгээний тасаг” 8 ортойгоор үйл ажиллагаагаа эхлүүлсэн.
-Орхон сумын эрүүл мэндийн төвд 2021 онд “Эрүүл хүүхэд эрүүл шүд” хөтөлбөрийн хүрээнд Эрүүл мэндийн яамны хөрөнгө оруулалтаар шүдний иж бүрэн аппараттай боллоо.

ЭМЯ-аас 2022 оныг “Эмнэлгийн тусламж үйлчилгээний чанар, аюулгүй байдлыг сайжруулах”жил,Дархан-Уул аймаг “Хүүхэд хамгааллын жил” болгож зарласан. Мөн НҮБ, Тогтвортой хөгжлийн үзэл баримтлал 2030 “Хэнийг ч орхигдуулахгүй байх” зорилтыг дэвшүүлсэн. Энэхүү зорилтын хүрээнд эрүүл мэндийн тусламж үйлчилгээний чанар, хүртээмжийг дээшлүүлэн, эмнэлгийн тусламжийн хамрагдалтыг сайжруулах, иргэд үйлчлүүлэгчийн эрэлт хэрэгцээнд нийцсэн тусламж үйлчилгээг үзүүлэх, хүн амын эрт илрүүлэг урьдчилан сэргийлэх үзлэгийг чанартай хийж, илэрсэн өвчлөлийг эрүүлжүүлэх, үр дүнг тооцож ажиллахаар төлөвлөсөн юм.

22-03-30 06:16

ТҮРГЭН ТУСЛАМЖИЙН ТАСАГ ДУУДЛАГЫН АВТОМАШИНЫХАА ТООГ 2-ООР НЭМЭГДҮҮЛЛЭЭ

Манай аймаг ижил түвшний гадаадын 21 муж, хотуудтай найрамдал хамтын ажиллагаа, ах дүүгийн харилцаатай. Эдгээр найрамдалт харлцаатай 21 аймгийн нэг болох БНСУ-ын Кёнги аймаг юм.

22-03-30 06:14

ИРГЭДИЙН ГОМДЛЫН МӨРӨӨР АЖИЛЛАВ

Хээтэй хорооллын 5.3 дугаар байрны оршин суугч халаалт муу байгаа талаар гомдол гарсны дагуу өнөөдөр /2022.03.21/ “ДДС” ТӨХК-ийн холбогдох ажилтан албан хаагчид газар дээр нь ажиллалаа.

22-03-30 06:10

ЗАВХАН АЙМГИЙН ТӨРИЙН АЛБАН ХААГЧИД ДАРХАН ХОТЫН ЗДТГ-Т АЖИЛЛАЖ ТУРШЛАГА СУДЛАВ

Дархан-Уул аймаг 325.5 мянган га талбайтай, 104 мянга гаруй хүн амтай. Засаг захиргааны нэгжийн хувьд 4 сум, 26 багтай. Аймгийн ЗДТГ 6 хэлтэстэй. 41 төрийн албан хаагч ажиллаж байна. ЗГ-ын 377 дугаар тогтоолоор 2022 оноос 46 орон тоотойгоор ажиллахаар болсон.

Харин Завхан аймаг 72 мянган хүн амтай. 24 сумтай, 115 багтай. Энэ ондоо багтаан ЗДТГ-ын бүтэц орон тоог нэмэгдүүлж 46 албан хаагчтай ажиллахаар төлөвлөсөн. Хүн амд төрийн үйлчилгээг түргэн шуурхай чирэгдэлгүй хүргэх, цахим засаглалыг хэрэгжүүлэх тал дээр Дархан-Уул, Орхон, Сэлэнгэ зэрэг дэд бүтэц хөгжсөн аймгуудаас түлхүү туршлага судалж байгаа юм байна.

Дархан-Уул аймаг “Е-Darkhan” дэд хөтөлбөрийг 2009-2012, 2013-2016 онд, “Ухаалаг Дархан” дэд хөтөлбөрийг 2017-2020 онд тус тус хэрэгжүүлсэн. Цахим үйлчилгээний нэгдсэн портал (e-mongolia.mn)-д төрийн 89 үйлчилгээг шилжүүлсэн. Нэмж 200 гаруй үйлчилгээг шилжүүлэхээр ажиллаж байна. Төрийн үйлчилгээг иргэдэд түргэн шуурхай хүргэх зорилгоор 7037-1212 дугаарыг төрийн байгууллагуудын нэгдсэн лавлах болгож төрийн үйлчилгээний 8 байгууллагатай холбож түгээмэл асуултад автомат хариулагч холбосон, мөн оператор ажилллаж байна.

Хонгор сумын Хүйтний гол, Мухарын голын бэлчир, Зулзага амралтын бүс, Дархан сумын 2 дугаар баг, Ширээ нуруу, Хөтөл хороолол, Орхон сумын төвд мобикомын 4G сүлжээний өргөтгөлийг энэ онд хийнэ.

Аймгийн Засаг даргын 2021-2024 онд хэрэгжүүлэх үйл ажиллагааны хөтөлбөрийн нийт 66 зорилтын 40 гаруй нь Цахим хөгжилтэй холбоотой тодорхой төсөл, хөтөлбөрүүдийг төлөвлөсөн байна.Үүнд:

● “Цахим Дархан”

● “Шилэн эмнэлэг-II”

● “Цагийн ажил”

● “Чадварлаг багш”

● “Цахим сургалтын систем” зэргийг батлуулан ажиллаж байна.

Завхан аймаг 2022 онд цахим аймаг болох зорилт тавин бусад аймгуудын сайн туршлагыг судалж байна. Завханыхан Улиастай хотынхоо үйлчилгээний төвд “Төрийн үйлчилгээний цахим төв”-тэй болохоор төлөвлөж байгаа юм байна. Өнөөдөр тус аймгийн төлөөлөл Дархан-Уул аймгийн “Нийтийн үйлчилгээний нэгдсэн төв”-ийн үйл ажиллагаатай мөн танилцсан юм.

Дархан-Уул аймаг аймгийн эдийн засаг, нийгмийг тогтвортой хөгжүүлэхэд чиглэгдсэн Алсын хараа-2050, Шинэ сэргэлтийн бодлого, Дархан хотын хөгжлийн Ерөнхий төлөвлөгөө-2035, Дархан-Уул аймгийн Засаг даргын 2021-2024 оны үйл ажиллагааны хөтөлбөр зэрэг бодлогын баримт бичигт тусгагдсан зорилт арга хэмжээний хүрээнд ойрын 10 жилдНогоон Дархан-2032

Боловсрол-2032

Эрүүл Дархан-2032

Эрчимжсэн МАА суурилсан ХАА бодлого

Хөдөлмөр эрхлэлт-Ажлын байр-Аж үйлдвэрийн бодлогыг хэрэгжүүлэн ажиллахаар зорьж байгааг аймгийн удирдлагууд танилцууллаа.

Дархан-Уул аймаг эдийн засгийн өрсөлдөх чадварын индекс, хүний хөгжлийн индексээр улсдаа 3-т эрэмбэлэгдэж байна.

Дархан-Уул аймгийн ЗДТГазар нь Чанарын менежментийн тогтолцооны ISO 9001:2015 олон улсын стандартыг үйл ажиллагаандаа нэвтрүүлсэн орон нутгийн төрийн захиргааны байгуулага болсноороо онцлогтой юм.

22-03-30 06:05

ИРГЭДИЙН ИНДЭР НЭЭЛТТЭЙ УУЛЗАЛТ 2022.03.28-НЫ ӨДРИЙН 11:00 ЦАГТ БОЛНО

Иргэд та бүхэн биечлэн болон онлайнаар уулзалтад оролцож төрийн байгууллагуудын үйл ажиллагааны талаарх санал шүүмжлэл, хотын хөгжлийн талаар өөрийн үзэл бодол, дуу хоолойгоо илэрхийлээрэй. Уулзалтад биечлэн оролцох бол 7037-1212 дугаарын утсаар урьдчилан бүртгүүлнэ. DBS, RGB Цэц.мн, Дархан хот фэйсбүүк пэйж хуудсуудаар уулзалтыг шууд дамжуулна.

22-03-29 09:03

НАУРЫЗЫН БАЯРЫГ ТОХИОЛДУУЛАН ТӨРИЙН ДЭЭД ОДОН, МЕДАЛЬ ГАРДУУЛЛАА

Наурызын баярыг тохиолдуулан Дархан-Уул аймгийн Уул уурхай, барилга, хүнс, хөдөө аж ахуй, эрүүл мэндийн салбар болон хувийн хэвшилд олон жил, идэвх зүтгэл, үр бүтээлтэй ажилласан дараах нэр бүхий иргэдийг Монгол Улсын Ерөнхийлөгч Ухнаагийн Хүрэлсүхийн зарлигаар төрийн дээд одон, медалиар шагнасныг УИХ-ын гишүүн Г.Дамдинням, Дархан-Уул аймгийн Засаг дарга Б.Азжаргал нар гардуулан өглөө.

АЛТАН ГАДАС ОДОНГООР

1. Жашенбай Биле Хонгор сумын 2 дугаар багийн ахмад настан

2. Ахат Биший Хүслэн эмнэлгийн сувилагч, бэлтгэл ахлагч

3. Султан Замерхан Дархан сумын 11 дүгээр багийн ахмад настан

4. Хамза Мархашхаан Дархан сумын 11 дүгээр багийн ахмад настан

5. Бердмурат Мумкин Хонгор сумын 2 дугаар ахмад настан

6. Солтан Сайлау Хонгор сумын 1 дүгээр багийн ахмад настан

7. Жүкей Силанпул Дархан сумын 15 дугаар багийн ахмад настан

8. Тохой Танатар Хонгор сумын 2 дугаар багийн ахмад настан

ХӨДӨЛМӨРИЙН ХҮНДЭТ МЕДАЛИАР

1.Шагимурат Акила Хонгор сумын 2 дугаар багийн ахмад настан2.Суыр Рахым Хонгор сумын 2 дугаар багийн ахмад настан

22-03-29 09:00

НАРНЫ БАЯРАА ӨРГӨН ДЭЛГЭР ТЭМДЭГЛЭЛЭЭ

Дархан-Уул аймгийн Дархан сумын Казах иргэд хаврын баяр буюу наурызын баяраа тэмдэглэлээ. Баярын үйл ажиллагаанд УИХ-ын гишүүн, БСШУС-ын байнгын хорооны дарга Г.Дамдинням, Дархан-Уул аймгийн Засаг дарга Б.Азжаргалнар оролцсон юм.

22-03-29 08:54

ДЭВШИЛТЭТ ТЕХНОЛОГИЙГ АГРОБИЗНЕСТ НЭВТРҮҮЛНЭ

Дархан-Уул аймгийн Засаг даргын орлогч Б.Жавхлан тэргүүтэй албаныхан Измон агротехникийн гүйцэтгэх захирал Яайр Жакоб Порат, Нетафимын хүлэмжийн хэлтсийн ахлах агрономич Ориан Шалев нарын хүмүүстэй албан уулзалт хийлээ.

22-03-29 07:07

Эрсдэлгүй Дархан аяны хүрээнд төрийн өмчийн 24 сургууль, цэцэрлэгт цахилгааны болон галын эрсдэлийн үнэлгээ хийжээ

“Эрсдэлгүй Дархан” аяны хүрээнд Аймгийн ИТХ-аас санаачлан БШУГ, ЦДҮС ТӨХК-тай хамтран Дархан сумын төрийн өмчийн 24 сургууль, цэцэрлэгт цахилгааны болон галын эрсдэлийн үнэлгээ хийж дүгнэлтийг танилцууллаа.

Цаашид ЕБС, СӨББ-иудын цахилгааны асуудал хариуцсан мэргэжлийн бус албан хаагчдад эрчим хүчний ашиглалт, засвар үйлчилгээний анхан шатны онолын сургалтад хамруулах, мэргэжил арга зүйгээр хангах асуудлыг авч хэлэлцлээ.