Дархан-Уул аймагт Биеийн тамир спортын газар үүсгэн байгуулагдсаны 60 жилийн ойн баярын хурал өнөөдөр боллоо. Баярынхаа өдрөөр олон жил үр бүтээлтэй ажилласан албан хаагчдыгаа аймаг орон нутгийн шагналаар шагнан урамшуулсан юм.
Жаран жилийн ойгоо угтан нэг сарын хугацаанд спортын олон төрөлт тэмцээн уралдаан зохион байгуулж спортын түүхээ харуулахуйц товхимол ном, засвар шинэчлэлтийн ажлууд, иргэдэд чиглэсэн соён гэгээрүүлэх контентыг цуврал хэлбэрээр бүтээжээ. Дархан хотоос тив дэлхийд цуутай тамирчдыг төрөн гаргадаг аймгийн биеийн тамир спортын газар нь 51 төрлийн спортын холбоодтой хамтран ажилладаг байна. Мөн орон нутгаас анх удаа 17 спортын төрлөөр шигшээ багаа бүрдүүлж чадсан аймаг юм.
Жаран жилийн түүхэнд Дарханаас долоон гавьяат дасгалжуулагч, долоон гавьяат тамирчин төрөн гарч, түүнчлэн 2021 онд Монгол улсдаа анхны “Алтан гадаст” одонт биеийн тамирын хороо болж байв. Энэ жил улсын чанартай тэмцээнээс 128 медаль хүртсэнийг аймаг орон нутгаас дэмжин 167 сая төгрөгөөр урамшуулжээ.
Дархан-Уул аймаг жил бүрийг хүүхэд хамгааллын жил, өсвөрийн баг тамирчдыг дэмжих жил болгон зарласан. Энэ хүрээнд өсвөрийн тамирчдаа дэмжин 2024 онд үйлдвэрлэсэн Mitsubishi Rosa маркийн 28 хүний суудалтай дунд оврын автобусыг 60 жилийн ойн өдөр /2024.11.02/ гардуулан өглөө. Дархан сумын ОНХС-ын 247 сая төгрөгийн хөрөнгө оруулалтаар Дизель /Евро III/ хөдөлгүүртэй, тус автобусыг “МСМ Групп” ХХК-аас нийлүүлж байна.
Тус автобусаар зөвхөн өсвөрийн баг, тамирчид үйлчлүүлэх юм.
Нийтийн биеийн тамирын спортыг түгээн дэлгэрүүлэн хөгжүүлж яваа үе үеийн дасгалжуулагч, тамирчдадаа ойн баярын мэндийг дэвшүүлье.
