Дархан-Уул аймгийн сургуулийн өмнөх болон ерөнхий боловсролын салбарын 2022-2023 оны хичээлийн жилийн ололт амжилт, 2023-2024 оны хичээлийн жилийн зорилго, зорилт, онцлогийг нийт удирдах ажилтнууд, багш нарын төлөөлөлд танилцуулах Дархан-Уул аймгийн сургуулийн өмнөх болон ерөнхий боловсролын салбарын багш, удирдах ажилтнуудын бага хурал боллоо.
Монгол Улсын Засгийн газар, Боловсрол, шинжлэх ухааны яамнаас 2023-2024 оны хичээлийн жилийг “БОЛОВСРОЛЫН ШИНЭ СЭРГЭЛТ-ийн жил болгон зарлаж, боловсролын түүхийн шинэ хуудсыг эхлүүлж байгаа түүхэн цаг үед энэ удаагийн багш нарын бага хурал зохион байгуулагдаж байгаагаараа онцлог юм.
“БОЛОВСРОЛЫН ШИНЭ СЭРГЭЛТ” бага хурлыг нээж УИХ-ын гишүүн, Сангийн сайд Б.Жавхлан цахим мэндчилгээ дэвшүүлж, Аймгийн засаг дарга Б.Азжаргал, Аймгийн БШУГ-ын дарга Л.Буянтогтох нар үг хэлж мөн мэндчилгээ дэвшүүлээ.
Аймгийн Засаг дарга Б.Азжаргал:
“Шат шатны боловсролын байгууллагын хүртээмжийг нэмэгдүүлэх, багш сурган хүмүүжүүлэгч нар болон сурагч хүүхэд багачуудын сурах орчин нөхцөлийг сайжруулах тал дээр аймгийн орон нутгийн зүгээс үе шаттай ажлуудыг хийж байна.
– “Боловсрол 2032” хөтөлбөрөөр дамжуулан эхний ээлжид багш нарын 70 хувийг зөөврийн компьютерээр хангасан, энэ жилдээ үлдсэн хувийг хангаж дуусна.
- Соёлын байгууллагууд, сургуулийн өмнөх боловсролын байгууллагыг үүнд хамруулахаар төлөвлөж байна.
- Багшаар ажилладаг 10 гэр бүлийг 2 жилийн хугацаатай түрээсийн орон сууцаар хангана.
- Англи хэлний IELTS-ийн сургалтад ЕБС-ийн сурагчдыг хамруулна.
- “Гоё сургууль” хөтөлбөрийн хүрээнд ЕБС-ийн нийтийн бие засах өрөө, спорт заал, спорт заалны хувцас солих өрөө, урлагийн заалыг шинэчлэн засварлана.
- ЕБС-ийн нийт 17 сургуульд 19 ухаалаг танхимыг байгуулсан, хичээлийн шинэ жилээр нээлтийг хийнэ.
- Хүүхдийн автобусны тоог нэмж бүх чиглэлд хүртээмжтэй байдлаар явуулна.
Орон нутагт хийгдэж буй хөрөнгө оруулалт бүтээн байгуулалтын ажлууд, төсөл хөтөлбөрүүдийг хэрэгжүүлэхэд дэмжлэг үзүүлж буй Дархан-Уул аймгаас сонгогдсон УИХ-ын гишүүн, Сангийн сайд Б.Жавхлан, УИХ-ын гишүүн Г.Дамдинням, УИХ-ын гишүүн Б.Баттөмөр нарт нийт Дарханчуудын өмнөөс талархал илэрхийлье” гэлээ.
Монгол Улсын Их хурлаас батлан гаргасан, 2023 оны 08 дугаар сарын 03-ны өдрөөс албан ёсоор хэрэгжиж байгаа Боловсролын багц хуулийг Дархан-Уул аймгийн сургуулийн өмнөх болон ерөнхий боловсролын сургуулийн удирдлагуудад гардуулан өнөөдрийн ёслолын арга хэмжээ өндөрлөлөө.
Эрхэм хүндэт багш, сурган хүмүүжүүлэгчид, боловсролын салбарын ажилчид, сурагч багачууд та бүхэндээ хичээлийн шинэ жилийн мэндийг хүргэе.
