Унгар улсын Будафешт хотноо зохион байгуулагдсан насанд хүрэгчдийн Дэлхийн аварга шалгаруулах тэмцээнд Монгол Улсаа төлөөлөн Жудо бөхийн төрөлд амжилттай оролцож 60кг-ын жинд хүрэл медаль хүртсэн Дарханы хүү Кадербекын Ёолкод хүндэтгэл үзүүллээ.
Өдгөө 24 настай залуу тамирчин тэрээр анхны орсон ДАШТ-сээ ийнхүү хүрэл медаль хүртсэн нь Монголын Жудо бөхийн шигшээ багийн дэлхийн аваргын 32 дахь медаль, түүний дотор 19 дэх хүрэл медаль юм.
Түүний анхны багш бол Дархан-Уул аймагт 2009 оноос хойш хоёргүй сэтгэл, тууштай зүтгэлээр шавь нараа дасгалжуулж буй спортын мастер Д.Балжинням юм.
Аймгийн удирдлагууд хүрэл медальт тамирчинд хүндэтгэл үзүүлэхийн зэрэгцээ 3 сая төгрөг талархлын хамт гардуулсан бол Дархан хотын бүтээн байгуулалтад гар бие оролцож хувь нэмрээ оруулж яваа “Оргил Таур” ХХК-ын зүгээс баяр хүргэж Кадербекын Ёолк болон дасгалжуулагч багш спортын мастер Д.Балжинням нарт тус бүр 5 сая төгрөгийн мөнгөн шагналыг гардууллаа.
Монголын Жудогийн бахархал, эх орныхоо нэрийг дэлхийд дуурьсгаж яваа К.Ёолк танд нийт Дарханчуудынхаа өмнөөс халуун баяр хүргэж, улам их амжилтыг хүсэн ерөөе.
